வணக்கம்

வணக்கம்.

நம் தமிழ்நாட்டில் தடுக்கி விழுந்த்தால் கவிதை எழுதுபவர் கிடைப்பர். முதல் காதலால் கவிதை, அக்காதல் தோல்வியுற்றதால் கவிதை, கல்லூரியில் சேர்ந்ததும் கவிதை, கல்லூரி முடிவில் கவிதை, இப்படி தும்மல் விக்கல் முதற்கொண்டு எல்லாவற்றையும் கவிதை படுத்தி விட்டோம். 'நானும் கவிதை எழுதுவேன்' என சொல்வர் பலர். உண்மையில் அது 'நான் கவிதையும் எழுதுவேன்' என பொருள் கொள்ள வேண்டும்.

இப்படி கவிதை எழுதுவோர் பலர் இருக்க, சிலர் கவிஞராய் அமைகின்றனர். அப்படிபட்ட ஒரு கவிஞன், மஹாகவிஞன் பாரதி. வெள்ளைத் தாமரை மலர் மீது அமர்ந்து மறை நான்கையும் வாழச் செய்யும் வாணி அவள் பெயரை அடைமொழியாய் பெற்றவன் பாரதி. அப்படிபட்ட கவிஞனை, தமிழ்நாட்டின் தேசிய கவியை, ஆங்கிலத்தில் மொழி பெயர்ப்பது சிறியேனின் நீண்ட நாள் வேட்கை. இணையத்தின் துணையுடன், இன்று, இத்திருநாளில் (இன்று என்றுமே திருநாளன்றோ?) இப்பணியைத் துவக்குகிறேன்.

மொழி பெயர்ப்பு அமையும் விதம் இங்கனம் ஆகும். பாடலொன்றை எடுத்து முதலில் ஒவ்வொறு சொல்லிற்கும் பொருள் ஆங்கிலத்தில் விளக்கப்படும். பின் முழு பாடலுக்கும் மொழி பெயர்ப்பு அளிக்கப்படும். அதன்பின் பாடலின் கருத்தாராய்ந்து விளக்கவுரை தரப்படும். இறுதியில் என் மூளைக்கு எட்டிய அளவு பாடல் வடிவில் ஆங்கிலமாக்கம் தரப்படும்.

இவற்றைப் படிக்கவிருக்கும் வாசகர்களுக்கு சில விண்ணப்பங்கள்

1. எக்கருத்தாயினும் துணிந்து சொல்லவும். தவறிருப்பின் கடிந்தே கூறவும். திருத்திக் கொள்ள என்றும் விழைவேன்.

2. HTML, Blogger Template ஆகியவற்றில் தேர்ந்தோர் உதவி செய்ய விரும்பினால் என்னை தொடர்பு கொள்ளவும்.

3. இத்தளத்தைப் பற்றிய தகவலை நண்பர்களுடன் பகிர்ந்து கொள்ளவும்.

4. தாங்களும் இம்முயற்சியில் பங்கு பெற விழைந்தால் எனக்கு மின்னஞ்சல் அனுப்பவும். Blogger அழைப்பு அனுப்பப்படும்.

5. பாரதி பற்றி வேறேதும் செய்தியை பகிர்ந்து கொள்ள விழைந்தால் அது பற்றி மின்னஞ்சல் அனுப்பவும் - இத்தளத்தில் தங்கள் பெயருடன் அதனை வெளியிடுவோம்.

வாழ்க பாரதி, வளர்க அவன் புகழ்.